PREEKOPNAME: https://tinyurl.com/xvpxh4ps
Rom 8:28-30 (OAV)
28 En ons weet dat vir hulle wat God liefhet, alles ten goede meewerk, alles ten goede meewerk, vir hulle wat na sy voorneme geroep is.
29 Want die wat Hy vantevore geken het, díé het Hy ook vantevore verordineer om gelykvormig te wees aan die beeld van sy Seun, sodat Hy die eersgeborene kan wees onder baie broeders;
30 en die wat Hy vantevore verordineer het, díé het Hy ook geroep; en die wat Hy geroep het, díé het Hy ook geregverdig; en die wat Hy geroep het, díé het Hy ook verheerlik.
As ek vir 'n Christen sou vra wanneer hy gered is, vermoed ek die meeste sal sóiets antwoord: "Ek het Jesus aangeneem toe ek 22 was". Dis seker nie 'n verkeerde antwoord nie. Maar daar is Bybels 'n beter Bybelse antwoord, "Ek is gered toe ek wedergebore is op 22".
Terwyl niemand van ons sal aanstoot neem aan hierdie twee antwoorde nie, is dit tog jammer as so 'n persoon bloot sal vassteek by so 'n verstaan.
Om hierdie stelling te begryp, moet mens redding sien in die wonderlike en fassinerende lig wat die Nuwe Testament daarop werp. Dit is iets baie meer omvangryk en diepgaande as bloot 'n eenmalige handeling of gebeurtenis.
Dis volgens God se Woord 'n proses
wat vanuit die ewige verlede tot in die ewige toekoms in strek.
As mens jou redding in Christus eers só verstaan en dit deel van die oortuigings en belewinge van jou wandel met die Here word, word dit 'n vaste rots van sekuriteit onder jou. Dit word 'n kosbare fontein van dankbaarheid en sekuriteit en lof in jou.
Redding in Christus is 'n Ewig-geïntegreerde proses
Te maklik dink mens aan redding as bloot 'n eenmalige gebeurtenis. Maar dis nie hoe die Bybel oor redding praat nie. Verlossing in Christus is 'n proses – 'n geïntegreerde
eenheidsproses. Dit begin in die ewigheid vóór die grondlegging van die aarde met 'n persoon se uitverkiesing. En dit kom tot 'n afrondende klimaks met die opstanding uit die dood en die gepaardgaande heerlikmaking.
Betekenisvol is dan ook die drie werkwoordstye wat in die Skrif gebruik word vir redding: jy is gered, jy word gered, jy sal gered word.
Verlede tyd: Gered van die oordeel van sonde (regverdiging).
Efesiërs 2:8: "Want uit genade is julle verlos ..." (Eng. "have been saved ...").
2Timoteus 1:9: "Hy het ons verlos en geroep ...".
Hierdie redding is 'n "gawe van God" (Ef 2:8), op grond van sy "eie besluit en genade" (2Tim 1:9), en sy "ontferming" (Tit 3:5).
Teenwoordige tyd: Gered van die krag van sonde (heiligmaking).
1Kor 1:18 (NAV): "Die boodskap van die kruis is immers ... vir ons wat gered word ... die krag van God."
2Kor 2:15 (OAV): "... die wat verlos word ...".
Vir 'n ware Christen gaan die proses van redding dus daagliks voort – ervaarbaar en waarneembaar.
Toekomstige tyd: Gered van die teenwoordigheid van sonde (heerlikmaking).
Rom 5:9-10: "Hoeveel te meer sal ons ... deur sy lewe verlos word noudat ons met Hom versoen is."
Heb 9:28: "so sal Christus ... 'n tweede maal verskyn ... om hulle te verlos".
Die afronding, die klimaks, die vervolmaking kom nog.
Rom 8:28-30: Die hoofelemente van die reddingsproses
Amper alle Christene ken die eerste helfte van v.28: "Ons weet dat God alles ten goede laat meewerk vir hulle wat Hom liefhet ..."
Dis 'n wonderlike wáárheid, en ons moet onsself gereeld daaraan herinner.
Maar hierdie troosryke woorde word gevolg deur baie, baie méér – uiters belangrik en diepsinnig.
Het jy opgelet? Die 2020 is reg (anders as die OAV en NAV): Die drie verse is net één sin. Ons praat dus van 'n eenheid. Om net 'n gedeelte aan te haal, is nie reg nie. Nee! Nee!
Om hierdie verse volledig te verstaan, gee robuuste lewenslange geloofspiere.
Dr. Martyn Lloyd-Jones sê oor hierdie verse: "We are considering here one of the most remarkable statements that even this apostle ever made. It is also one of the most comforting statements in the whole range of Scripture. We are surely entitled to say that in respect of the statement of exalted doctrine there is really nothing higher than this. Here is ultimate doctrine."
Stap vir stap deur Rom 8:28-30
# Waarom het net party mense Hom lief? Hulle is "volgens Sý voorneme geroep". Hier is géén sprake van menslike inisiatief, willekeur of meriete nie.
Agter diegene wie se lewens gekenmerk word deur innige verlange, inspanning, worsteling en trane om hulle liefde vir die Here in gehoorsaamheid tot uitdrukking te bring, sit die uitverkiesende en herskeppende genade van 'n soewereine God.
# Vers 29 begin met "want". Die stelling in die vorige vers word dus gemotiveer. Waarom is v. 28 van hulle waar? Omdat hulle opgeneem is in God se ewige
verlossingsplan! En oor hierdie plan gaan die apostel nou in v. 29-30 wonderlike dinge sê.
# Die mense van wie hier gepraat word, is "tevore geken". Die idee is nie dat God vooraf bloot van hulle geweet het nie, maar dat Hy hulle liefgehad het en hulle dus uitgekies het – dat Hy as 't Sy hart op hulle gesit het.
"Om te ken" dui in die Bybel ten diepste op liefhê, eerder as op bloot verstandelike kennis. Gen 4:1: "die mens het sy vrou, Eva, bekén" (OAV). Ander gedeeltes waarin dit duidelik blyk, is o.m. Eks 2:25; Amos 3:2; Jer 1:5; Matt 7:22-23.
Jesus sê nie Hy het nie van hulle geweet nie; Hy het juis te véél van hulle geweet –vandaar sy verlossingswerk (1Kor 8:3; 2Tim 2:19. Vgl. Joh 17:3).
Die bepaalde begrip, om vooraf te ken, word ook op vier ander plekke in die N.T. met God as handelende gebruik: Hand 2:23 en 1Pet 1:20 (Jesus Christus as objek); Rom 11:2 (Jode as objek); 1Pet 1:2 (uitverkorenes as objek). Duidelik beteken dit meer as om bloot vooraf van iets of iemand kennis te dra. Dit dui op innig liefhê!
+ "Waarom, waarom ék?", vra mens noodwendig. Die antwoord is kortom: God het dit eenvoudig nie aan ons geopenbaar nie! Ons het geen benul nie. Hy is volkome en onbevraagtekenbaar soewerein – "klaar gepraat!"
# Nie alleen het God hierdie mense geken nie, oftewel liefgehad nie, Hy het hulle ook "bestem". Hy het dus 'n plan met hulle. Die Engelse predestine (ESV, NIV) vat die idee goed vas: Om 'n destinasie of bestemming vooraf vas te maak.
Hierdie eindbestemming word dan eksplisiet deur die apostel genoem: "om gelykvormig aan die beeld van Sy Seun te word".
# Tydens hulle lewe word hierdie bevoorregtes dan deur God "geroep". Hoewel die Bybel soms van 'n "algemene roeping" praat as dit verwys na die Evangelie-uitnodiging wat tot alle mense gerig word (vgl. Matt 20:16; 22:14), dui roeping in die Nuwe Testament meestal, soos hier, op effektiewe roeping. Dit is God se skeppende en lewendmakende spreke wat die wedergeboorte in 'n sondaar bewerkstellig, en hom of haar uit 'n geestelike dood opwek tot die ewige lewe in Christus.
Presies hier begin die ervaringsverwerkliking van redding in 'n sondaar se lewe. Só skep God immers tipies – deur sy gesagvolle spreke. Reeds in Gen 1 kom dit nege maal soos 'n refrein: "God het gesê: Laat ... " Ander Skrifgedeeltes waar roeping so gebruik word, is o.a.: Rom 1:6-7; 1Kor 1:9,26; Gal 1:15; Ef 1:18; Fil 3:14; 2Tim 1:8-9; Heb 3:1; 2Pet 1:10.
Hierdie lewendmakende werk of spreke van God geskied wanneer en soos Hy wil, deur die verkondiging van die Evangelie (Rom 1:16; 10:13-15; 1Kor 1:21; 2Tess 2:14). Die effektiewe roeping (herskeppend, wederbarend) werk dus deur die algemene roeping (die evangelie-uitnodiging en -appél tot alle mense). Hierdie roeping word elders genoem die "woord van waarheid" (Jak 1:18) en die "blywende woord" (1Pet 1:23).
# Geestelik lewend gemaak, stel hierdie mense nou hulle geloofsvertroue in Christus en word hulle deur God "geregverdig" (OAV; die NAV en 2020 se "vrygespreek" laat nie reg geskied aan die ryk en positiewe inhoud van hierdie begrip nie, soos hieronder sal blyk).
+ Regverdiging of regverdigmaking moet gesien word teen die agtergrond van die feit dat die gevalle mens 'n dubbele probleem voor God het. 'n Dubbelkuur is dus
noodsaaklik.
= Enersyds moet die vloek van sy skuld voor God uitgedelg word.
= Andersyds moet sy onvermoë om God te behaag aangespreek word.
+ Regverdiging is dus 'n dubbele juridiese uitspraak van God t.o.v. alle mense wat waarlik in Christus as Saligmaker glo.
Let op: Regverdiging as sodanig is objektief, nie subjektief nie (dit kan nie sterk genoeg beklemtoon word nie). Dit gebeur in God se boeke, buite my. Ja, ja, die effekte daarvan is inderdaad 'n ervaringswerklikheid – radikaal en lewensveranderend.
+ Agter hierdie uitspraak lê die beginsels van plaasvervanging en toerekening (Vgl. Rom 4 en 5). Die Seun van God, as Hoof van die nuwe mensheid, het plaasvervangend in die plek van God se uitverkorenes kom staan – en wat Hy gedoen het, word aan die gelowige soos in 'n boekhou inskrywing toegereken.
= Negatief word die gelowige se sondeskuld aan Hom toegereken – as 't ware teen Sy rekening afgeskryf. Hy is dus met hulle skuld gedebiteer.
Maar dis nie ál nie – en ons sal tot in ewigheid daarvoor dankbaar wees.
= Positief word Sy volmaakte geregtigheid – Sy totale en volkome gehoorsaamheid aan die Vader – aan die gelowige toegereken, as 't ware na sy of haar rekening oorgeboek. Hulle word dus met Sy gehoorsaamheid gekrediteer.
+ As God die opgestapeld-toegerekende sondeskuld van sy begunstigdes aan Sy Seun straf, sterf Hy daaronder – en ly Hy die helse smart wat hulle toegekom het.
= In die proses bewerkstellig Hy vryspraak vir sondaars, sodat hulle in God se boeke die status het van mense wat géén skuld in sy boeke het nie (Matt 20:28; Rom 3:25; 2Kor 5:21; Gal 3:13; Kol 2:13-15; 1Tim 2:5-6; 1Pet 2:24).
= Dis egter net die helfte van die wonder van regverdiging. Christus se toegerekende geregtigheid maak óók dat hulle in God se boeke die status, oftewel status het van mense wat Sy wet volkome gehoorsaam het (Rom 1:16-17; 3:21-28; 8:33-34; 10:3-4; Fil 3:9) – en as sodanig kwalifiseer vir die ewige lewe!
+ Hierdie waarheid lê aan die hart van 'n gelowige se redding. As sodanig moet dit diep ingegrafeer wees op die tafels van elke Christen se hart! Bepeins dit weer en weer. Dank die Here weer en weer daarvoor. Omhels dit weer en weer. Verlustig jou lewenslank daarin! [1]
Jesus se passiewe gehoorsaamheid red sondaars dus van die ewige verdoemenis;
en Sy aktiewe gehoorsaamheid verwerf vir hulle die ewige saligheid.
# Uiteindelik word hierdie mense dan deur God "verheerlik". Dit verwys na die opstanding uit die dood, wanneer hulle verlossing in Christus tot volmaakte afronding sal kom. Die lang proses van redding kulmineer dan in volkome gelykvormigheid aan die beeld van die Seun (vgl.1Joh 3:2-3).
Let wel: Die profetiese verlede tyd word, soos hier, gebruik om te beklemtoon dat iets, hoewel dit nog nie plaasgevind het nie, in God se ewige raadsplan vasgelê is en daarom vir seker sal gebeur. Só seker sal dit gebeur, dat dit so goed as reeds gebeur het!
Implikasies
# Paulus se sinsbou maak dit duidelik dat hierdie vyf elemente van verlossing soos die skakels van 'n onbreekbare ketting is: Diegene vir wie God tevore geken het, hulle (en nét hulle, maar inderdaad hulle álmal) word vantevore bestem; en hulle wat vantevore bestem is, hulle (en nét hulle, maar inderdaad hulle álmal) word geroep; en hulle wat vantevore geroep is, hulle (en nét hulle, maar inderdaad hulle álmal) word geregverdig; en hulle wat vantevore geregverdig is, hulle (en nét hulle, maar inderdaad hulle álmal) word verheerlik.
Hieruit volg 'n paar waarhede van onberekenbare teologiese belang – waarhede wat orals in die Skrif geleer word.
# As God Drie-enig 'n mens verlos, is dit iets wat Hý alléén soewerein inisiëer, realiseer en deurvoer. Soos reeds gesê, is daar wel elemente in 'n persoon se verlossing waarby hy inderdaad volledig en inspanned aktief betrokke is, maar híérdie vyf handelinge van God vorm die raamwerk waarbinne al die res plaasvind.
# In God se verlossingswerk gaan dit om spesifieke mense.
# 'n Uitverkorene se verlossing is 'n ewige verlossing – dit strek vanuit die ewige verlede en vloei in die ewige toekoms in.
# So 'n verlossing is onverbreekbaar geïntegreerd. As jy dit hoegenaamd ontvang, ontvang jy alles, sonder uitsondering. Met alles word al die elemente van die heilsorde bedoel: Uitverkiesing; Roeping; Wedergeboorte; Geloof; Regverdigmaking; Bekering; Aanneming; Heiligmaking; Volharding; Heerlikmaking.[2]
Om dit in Engels te stel: "It is a package deal; if you have it at all, you have it all"!
Pastorale effekte
# Sodra 'n gelowige die geïntegreerdheid van God se verlossingsplan begryp, dit werklik in die geloof aanneem, en vir homself toe-eien, bring dit 'n innerlike sekuriteit, vreugde en dankbaarheid wat geen geld kan koop nie.
Hy (of sy) weet dat die voortgang en ontwikkeling van sy lewe veilig verpak is in God se ewige en onfrustreerbare raadsplan. Rom 8:31-39 word dan vir hom nie net objektiewe waarheid nie, maar inderdaad belewingswerklikheid. Níks, dit weet hy, kan hom van God se liefde skei nie!
Hierdie vertroostende waarheid maak mens vry om die Here te dien op die enigste manier wat Hom behaag – in dankbare vrede, liefdesvertroue, en vasbeslotenheid – volgens Sy wil, soos duidelik in die Bybel beskryf.
Watter vrymaking hou gelowige omhelsing van Rom 8:28-30 nie in nie!
# Maar, mag sommige nou wonder, sal dit nie 'n traak-my-nie-agtigheid oor gehoorsaamheid en volharding veroorsaak nie? Sal mense nie dan maar terugsit in die waan dat God alles moet doen nie?
Die ervaring van derduisende deur die eeue is presies die teenoorgestelde. Waarhede, soos dié van ons verse, sus nie wáre gelowiges nie, dit lanseer hulle! Dis immers waarom die Heilige Gees dit geopenbaar het.
Baseer die apostel sy oproep tot heilige toewyding aan die Here nie júís op "die barmhartigheid van God" nie? Gaan dit nie gepaard met innerlike herskepping en wils- en begeerteverandering nie? Is vernuwing van denke nie júís die sleutel tot 'n lewe volgens God se wil nie? (Rom 12:1-2).
Soos 'n ou man in Amerika gesê het: "God has fixed my wanter!"
# Het jy die Here waarlik lief? Bevestig jou lewe van daaglikse, intelligente, bewustelike en verantwoordelike gehoorsaamheid dit? Werk dan "met vrees en bewing" aan jou verlossing!
Weet dan, dis omdat God "die gewilligheid en die optrede" in jou bewerk (Fil 2:12-13).
En Hy doen dit, omdat Hy jou vanaf die ewigheid af liefhet, en sal toesien dat jy in gelykvormigheid aan die beeld van Sy Seun tot in alle ewigheid deel van Christus se bruidsgemeente sal wees – en deel van die Vader se huishouding.
Dien dan die Here met 'n herskepte en onverdeelde hart!
><(((*>
Nico van der Walt
T: 082 848 9396
E:
YouTube: Nico van der Walt - Imago Dei
[1] Ek is jammer om dit te móét sê: Die leser wat hierdie waarheid verstaan, sal nou insien dat die 2020 en NAV se vertaling, "vrygespreek" – wat net die eerste komponent hierbo verreken – nie net 'n swak parafrase is nie, maar 'n ernstige waarheidsmistasting (vgl. wel die OAV; ESV; NIV).
[2] Bogenoemde volgorde is teologies en leerstellig van die allergrootste belang. Hoewel dit in die eerste instansie 'n logiese orde is, is die kronologiese uiteraard nie afwesig nie.